ꆺ ꑳ ꀉ ꄉ

    ꁱꊿ:ꀊꏂꑿꈬ

ꀉꄉ，ꉠꆺꑳꀉꄉꇆ！ ꀋꃅꋌꃢꆎꆹꇯꍝꃅꉪꐞꁧꀐꅀ？ ꌺꐞꇖꐞꌊꀊꄶꎭꀋꐥꅧꀋꐥ，ꐒꀋꐥꊀꀋꐥꌠꋧꃅꀊꋨꂷꇬꉜꄉꁧꀐꄿ？ ꈍꃅꑌꆎꆹꐙꄏꀐꌠꉬꋭ， ꐧꋦꋋꂷꆹꇯꍝꃅꊾꎭꊾꅧꇨ， ꐒꅍꊀꅍꀉꑌꇨ。 ꆎꆹꀑꆈꋍꍂ， ꀑꐎꑍꍂꌺꇖꎁꃅꈁꄽꎬꂷꄹ。 ꅽꎭꇁꅧꐪꋋꈨꆹꑳꐮꒊꃀꌡꃅꎵꑳꀕ， ꌕꑍꌕꉖꉉꑍꉉꀋꌐ。

ꀉꄉ， ꉠꆺꑳꀉꄉꇆ！ ꆎꆹꇯꍝꃅꉪꐞꁧꀐꅀ？ ꇉꅶꃰꐎꌟꃅꐰꁧꃲ， ꄚꅽꑌꑿꊇꌠꆹ， ꆏꄝꑳꉐꌕꁄꎭꇈꃲ。 ꑳꉎꁧꐙꁦꌕꂷ， ꋍꂷꀉꄉꑿꆫꅉ， ꋌꊂꇈꉈꆏ， ꑌꑿꀉꄂꂾꐞꀕꇈꃲ； ꋍꂷꀉꄉꈾꏿꅉ， ꋌꊂꇈꉇꆏ， ꈾꁧꀉꄂꉘꇕꇗꇈꃲ； ꋍꂷꀉꄉꈌꌋꅉ， ꋌꊂꇈꉈꆏ， ꈌꃅꄁꃰꏿꇈꃲ。 ꑳꐮꐦꐛꐦꌕꂷ， ꋍꂷꀉꄉꍯꊪꁍ， ꋌꊂꇈꉈꆏ， ꍯꁧꀉꄂꏁꐷꀕꇈꃲ； ꋍꂷꀉꄉꃅꋩꁍ， ꋌꊂꇈꉈꆏ， ꏪꈜꀉꄂꆲꏂꄓꇈꃲ； ꋌꂷꀉꄉꇌꂿꁍ， ꋌꊂꇈꉈꆏ， ꊖꆈꅡꊪꀕꇈꃲ。 ꑳꂾꇱꋓꇓꆈꀋꃀꂶꌠꇆ， ꋋꆹꉠꀉꄉꑋꅉꉬ， ꀃꑍꇈꉈꆏ， ꑳꅝꉒꐎꄓꌠꆹꈀꄸꂿꁧꂯ？ ꑳꉎꎆꈜꈛꌎꀊꋨꏢ， ꉠꀉꄉꑌꇁꑾꈜꉬ， ꀃꑍꇈꉈꆏ， ꍀꆿꈳꏦꐛꀐꀞ？ ꑳꐮꉷꃅꏦꎫꐭꀕꀊꋨꍈ， ꉠꀉꄉꇤꍤꇤꄻꑭꐨꈍꑋꀊꄶꁮꀋꐚ， ꀃꑍꇈꉈꆏ， ꌞꀿꆈꅊꀕꑌꉠꆺꑳꀉꄉꇬꀋꐊꃲ。

ꉠꆺꑳꀉꄉꑠꂷꑌ， ꉒꏂꆽꃴꏭ， ꆀꃅꌺꄿꂷꄸꇆ。 ꊾꇷꊾꏦꆹ， ꁦꀑꎺꁧꌡꂷꄸ； ꊾꒌꊾꆠꆹ， ꃅꈯꏨꆉꌡꂷꄸ。 ꁮꂿꐚꂿꀉꑐꌌꌉꌠꂷꄹ， ꐋꂿꊈꂿꁮꑟꃘꌺꌡꂷꄸ。 ꉂꃅꋊꃤꆏꐊꋺ， ꀺꃅꃷꇎꆏꐊꋺ； ꇮꃅꐋꀨꆏꐊꋺ， ꑳꃅꊈꌐꆏꐊꋺ。 ꈮꅐꃆꇭꆏꋩꋺ， ꅳꍩꆽꏀꆏꀵꋺ； ꑳꃹꐂꇓꆏꏾꋺ， ꃌꂿꌺꂿꑖꈈꀕ。 ꉠꆺꑳꀉꄉꑠꂷꑌ， ꑍꈭꑍꊎꉬ， ꍅꃅꈾꃅꆏꐥꋺ； ꌕꈭꌕꊰꏁ, ꏂꃅꇭꃅꆏꋦꋺ。ꎆꎹꋚꈹꀉꐩꆼꏦꆏꑟꋺ， ꑌꎹꑿꎷꏛꏂꁨꈌꆏꑟꋺ；ꉎꆹꇤꇉꆹꀸꆏꑟꋺ， ꐰꆹꒊꆈꑸꀝꆏꑟꋺ。ꊈꇁꌐꎔꈍꑋꆏꎹꆀꃅꇖꈌꎭꀋꐚ，ꐋꇁꄊꀖꈍꑋꆏꎸꉷꃅꏦꎫꎭꀋꐚ。

ꀉꆨꋍꃢꇬ， ꀿꐰꌺꈩꌒꋺꃲ， ꃀꐮꅪꈩꌒꋺꃲ。 ꌕꋊꌕꀥꐮꐊꈄꋺꃲ， ꌕꃈꌕꅪꐮꐊꎔꋻꃲ。 ꀿꃀꈀꐥꅉ， ꌺꇖꏮꏑꏿꋺꃲ； ꌺꇖꈀꐥꅉ， ꀿꃀꒊꌋꀕꋺꃲ。 ꆺꑳꀉꄉꇆ，ꅽꉙꇁꂘꅇꆹ， ꇉꄩꇪꀮꌡꃅꐝꄧꀕ， ꈍꄮꑌꌺꇖꉌꂵꑌꌠꄸ。 ꅽꉂꇁꑟꅅꆹ， ꃅꃴꈭꏂꌟꃅꇖꈭꀕ， ꈍꄮꑌꉪꊈꇬꇉꀀꌠꄸ。 ꄚꐧꇂꃰꊿꆹ, ꐯꀋꐞꌠꀋꐥ， ꏛꃅꐞꌠꐥ，ꑎꃅꐞꌠꐥ。ꊿꐥꋍꍂꇪꀮꌕꆩꄷꋋꈨꆏꉉꋺ，ꑠꃅꑴꇬꌺꇖꆹꈍꃅꑌꉘꇊꉘꀋꅐꇬꎷꌠꄸ。ꀃꑍꇈꉇꆏ， ꆺꑳꈥꇤꀕꇈꃲ， ꌺꍸꇢꇑꉈꇈꃲ， ꃰꌗꉈꌗꀉꄸꈺꄂꀕꇈꃲ。ꀿꉂꇱꋓꍬꂯ， ꇱꋓꍬꀕꈤꇁꇐ， ꃀꉂꇁꄿꋖꂯꑌ， ꇁꄿꋕꀕꈤꇁꇐ。ꃅꑍꈜꀕꎴ， ꃅꌋꆈꋧꋪꇈꃲ。ꀋꌧꀿꄹꅲꂯꑌ， ꀿꆹꇢꅉꎴꁧꃲ， ꀋꂿꀿꄷꎹꂯꑌ， ꀿꆹꂸꀱꇁꎜꄉꇈꃲ。

ꀋꏦꇊ，ꀋꏦꇊ！ ꆺꑳꀉꄉ， ꁧꌠꀅꌳꁧ， ꑌꌠꀅꌳꑌ。 ꆎꑌꀅꌳꀅꌳꁧ， ꉪꑌꀅꌳꀅꌳꑌꂿꂸ。 ꁍꐊꑱꍹꁧꅊꇈ， ꀿꐊꎭꁻꁧꅡꇈ！ ꆎꆹꌺꉘꋊꏦꄉꇈꃲ， ꅩꉘꌐꏦꄉꇈꃲ， ꌺꇖꑲꅉꌆꄉꃲ， ꑮꒃꋑꋉꌺꇖꀱꋓꀕꄉꃲ。 ꅽꅿꌺꇖꆹꈪꑌꇔꍣꃅꄉꐤꅊꈫ， ꈏꑌꊋꑌꃅꄉꐥꅊꈫ！